Home Живот Др. Нико објаснува како изгледа кога некој се бори за воздух и...

Др. Нико објаснува како изгледа кога некој се бори за воздух и упатува силен апел

Др. Нико Беќаровски: „Како доктор кој цели 30 години работи УРГЕНТНА МЕДИЦИНА, см ртта постана дел од мојата работа. Во сите овие години бројни човечки судбини и животи згаснувале пред моите очи.

Да, и по толку години секое згаснување на човечкиот живот, остава белег во некоја мозочна келија, но и чемер во душата.
Но тоа што не може никогаш да се избрише кога пред вашите очи згаснува живот, кој се бори да вдише воздух.

На почетокот е потполно свесен, Ве моли да му го зголемите доводот на кислородот, а Вие знаете дека веќе сте го ставиле апаратот на максимум.

Ве прободува со поглед, зениците очајно му се шират, се погласно моли за малку кислород. По неколку минути започнува неповрзано да збори, да вика, да испушта разни звуци, мозочната хипооксија го прави своето.

Полека започнува да помодрува, да набрекнуваат вратните жили, градниот кош непрекинато се шири и собира, четириесетина пати во минута и оддеднаш МОЛК.

Во првиот момент Ви олеснува, бидејќи знаете дека маките на пациентот престанале, но тогаш започнуваат Вашите маки, Вашиот неспокој, кој уште долго ќе Ви го одзема сонот, тие десеттина минути ќе бидат Вашиот постојан немир.

Драги мои сограѓани, приближно вака згаснува секој фатален исход од новиов вирус. Со нашето неодговорно однесување, дозволивме здравствените капацитети да ни се преполнат.

Немојте да дозволиме да се доведеме во ситуација кога овие апокалиптични сцени ќе станат наше секојдневие.

Добро размислете, дали со Вашето несовесно однесување ќе бидете и Вие сведок, кога некој Ваш близок ќе го поминува овој пекол. А, лузната која ќе Ви остане во душата доживотно ќе Ве прогонува.

А толку лесно може да се спречи. Два метри дистанца, носење маски каде треба, миење раце, одговорно однесување. Дали е премногу, дали е претешко?“